ქართული სცენის პრიმადონად წოდებული მომღერლის, ლელა წურწუმიას მორიგმა სოლო კონცერტმა, რომელიც 29 მარტს მომღერალმა ჯგუფ „ჩვენი ბენდი“-სთან ერთად, საკონცერტო სივრცეში „MONO HALL“ გამართა, ანშლაგით ჩაიარა.
წურწუმიამ ტრადიცია არც ამ შემთხვევაში დაარღვია და მაყურებლის წინაშე, სპეციალურად ამ დღისთვის შექმნილი ლუქით წარსდგა, რომელმაც დიდი მოწონება დაიმსახურა.
კონცერტზე ასევე შესრულდა სიმღერის პრემიერაც, რომელიც მომღერალმა ქართველ ემიგრანტებს მიუძღვნა.
სიმღერის ავტორი, კომპოზიტორი ვაჟა დურგლიშვილია.
ლელა წურწუმიამ კონცერტზე ცნობილი დუეტები შეასრულა, დუეტ „ჯორჯიასთან“, მაკა ზამბახიძესთან და გიორგი თორაძესთან ერთად.
