როდესაც 13 წლის მოზარდების უმეტესობა თავისუფალ დროს თამაშსა და გართობას უთმობს, ლუკა ცხადაია საკუთარ მომავალს უკვე მოდის სამყაროში ქმნის.
მიუხედავად მცირე ასაკისა, ლუკა თვითნასწავლი დიზაინერია, რომელმაც მოდის მიმართ სიყვარული და ინტერესი საკუთარ შემოქმედებაში გადააქცია.
პროფესიული განათლების გარეშე, მხოლოდ შრომის, მუდმივი ძიებისა და შემოქმედებითი ხედვის წყალობით, ის სამოსის ესკიზებს ქმნის და საკუთარ დიზაინერულ ხელწერას აყალიბებს.
ახალგაზრდა დიზაინერის ნამუშევრები გამოირჩევა თანამედროვე ხედვით, ფერების თამამი შეხამებითა და დეტალებისადმი განსაკუთრებული ყურადღებით.
თითოეული ახალი ესკიზი მისთვის მხოლოდ ჩანახატი კი არა, არამედ კიდევ ერთი ნაბიჯია დიდი მიზნისკენ.
ლუკა აქტიურად სწავლობს მსოფლიო მოდის ტენდენციებს, აკვირდება ცნობილი დიზაინერების შემოქმედებას და ცდილობს, საკუთარი ინდივიდუალური სტილი შექმნას.
მისი თქმით, მოდა მისთვის მხოლოდ სამოსი არ არის — ეს საკუთარი აზრისა და ემოციის გამოხატვის ერთ-ერთი ყველაზე ძლიერი ფორმაა.
მიუხედავად იმისა, რომ მისი პროფესიული გზა ახლა იწყება, ლუკას მონდომება და შრომისმოყვარეობა უკვე ბევრის ყურადღებას იპყრობს.
მსგავსი ისტორიები კიდევ ერთხელ ადასტურებს, რომ ნიჭს ასაკი არ აქვს, ხოლო მიზანდასახულობა ხშირად წარმატების ყველაზე მყარისაფუძველია.
Fashiontime.ge ახალგაზრდა ქართველ დიზაინერს წარმატებას უსურვებს და დარწმუნებულია, რომ ლუკა ცხადაიას სახელს მომავალში კიდევ არაერთხელ მოვისმენთ — უკვე დიდი მოდის პროექტებისა და საერთაშორისო პოდიუმების კონტექსტში.
